जताततै पहिरो हटाउन मुस्किल

nmuglin-nayrayangadh-pahiro_20180703060034.jpg

भरतपुर : नारायणगढ-मुग्लिन सडकखण्डको तोपे खोलामा गएको पहिरोले दुईतर्फी सडक अवरुद्ध भएपछि त्यसलाई सुचारु गर्न चार घण्टा लाग्यो । पहिरो सफा गरेर एकतर्फी बाटो सुचारु गर्न लाग्दा त्यसैको नजिक साँझ ६ बजे फेरि चार किलोमा पहिरो खसेर बाटो अवरुद्ध भयो ।

लगातारको वर्षाका कारण पहिरो सफा गर्न कठिनाइ भएको थियो । एक स्थानको पहिरो सफा गर्न नपाई अर्को स्थानमा पहिरो जाने समस्याले दिनभर यातायात प्रभावित भयो । चार वटा मेसिन दिनभर पहिरो सफा गर्न व्यस्त थिए । त्यसअघि मुग्लिन बजार नजिक पहिरो जाँदा बाटो अवरुद्ध भएको थियो ।

पहिरोका कारण नारायणगढ–मुग्लिन सडकखण्ड सोमबार दिनभरै प्रभावित बन्यो । ठाउँ ठाउँमै पहिरो जाने समस्याले पटकपटक यातायात अवरुद्ध भयो । दिनभरजसो प्रहरी र आयोजनाका कर्मचारीलाई पहिरो हटाउन हम्मे हम्मे परेको थियो । उक्त सडकखण्डको ६ स्थानमा पहिरो गएको थियो ।

राजधानीसँग जोडिने मुख्य राजमार्ग मानिएको उक्त खण्डमा सोमबार दिनभर पहिरो खसेको थियो । मुख्य गरी चार किलो र तोपे खोलामा पटक पटक पहिरो जाने गरेको छ । पानी नरोकिएपछि पहिरोका कारण यात्रुले दिनभर सास्ती पाएका थिए । ‘कहाँ कतिबेला पहिरो जान्छ अड्कल गर्न सकिँदैन’, जिल्ला ट्राफिक प्रमुख वेदप्रसाद गौतमले भने, ‘एक ठाउँमा सफा ग¥यो अर्को ठाउँमा खस्ने हुँदा सफा गर्न समय लाग्दा यातायात प्रभावित बनेको हो ।’

जलविरे, चेपाङ डाँडा, भालुढुंगा, कालीखोला, मुग्लिन नजिकको डाँडामा दिनभर पहिरो खसेको थियो । सबैभन्दा ठूलो तोपे खोला र चार किलोमा पहिरो खसेको हो । कमजोर भूबनोटका कारण सामान्य वर्षामा पनि पहिरो खसेको सडक आयोजनाले जनाएको छ । आयोजनाका सूचना अधिकारी शिव खनालले कमजोर भूबनोटका कारण पहिरो खसेको बताए ।

                                            Sources:Annapurna Post