विकासमा फड्को पार्ने क्रममा नेपाल, मेलेसियाबाट नेपाल सम्म रेल सञ्जाल विस्तार गर्ने प्रस्ताव

राजधानीमा सुरु भएको नेपाल लगानी सम्मेलनमा मेलेसियाबाट नेपाल सम्म रेल सञ्जाल विस्तार गर्ने प्रस्ताव आएको छ । मलेसियाका पूर्वयातायातमन्त्री डा। एम केभासले क्वालालम्पुरबाट काठमाडौंसम्म रेल सञ्जाल विस्तार गर्न प्रस्ताव गरेका हुन् ।

मलेसियाका पूर्वयातायातमन्त्री डा.एम केभासले दुई देशलाई रेल सञ्जालाले जोड्न मलेसिया सकारात्मक रहेको बताउँदै अहिलेको समय भनेको पूर्वाधारमा ठूलो रकम खर्चिनुपर्ने बेला रहेको बताएका छन् । उनका अनुसार मलेसियाबाट चीनको सिगात्से हुँदै काठमाडौंसम्म रेल ल्याउन सकिन्छ । पच्चीस वर्षपछि नेपालमा भएको लगानी सम्मेलनका मुख्य वक्ता भारतीय वित्तमन्त्री अरुण जेट्लीले नेपालको प्राकृतिक स्रोतसाधनमा लगानीको ठूलो अवसर रहेको उल्लेख गर्दै ऊर्जा, कृषि, पर्यटन र पूर्वाधारका क्षेत्रमा विदेशी लगानी भित्र्याउन सुझाव दिएका छन् ।

भारतीय वित्तमन्त्री अरुण जेट्लीले नेपालको आर्थिक विकासका लागि ठूलो लगानी आवश्यक रहेको समेत औंल्याए । ‘भारतले खुला अर्थनीति अवलम्बन गर्यो । निजी क्षेत्रलाई लगानीको बाटो खुला गर्यो । विदेशी लगानीलाई सहज बनायो । स्वदेशी(विदेशी लगानी बढेपछि भारत आर्थिक विकासमा अगाडि बढ्न सकेको हो’, जेट्लीले भने, ‘नेपालको समृद्धिका लागि पनि बढीभन्दा बढी लगानीको आवश्यकता छ ।’ लगानी सम्मेलनले नेपालमा लगानीको वातावरण बनाउने उनको विश्वास छ ।

साढे दुई सय विदेशी लगानीकर्तासहित हजारजनाभन्दा बढी सहभागी सम्मेलनको उद्घाटन राजधानीमा एक भव्य समारोहबीच प्रधानमन्त्री पुष्पकमल दाहालले गरेका थिए । प्रधानमन्त्री दाहालले संविधान निर्माणपछि मुलुक आर्थिक समृद्धिको बाटोमा अगाडि बढेको उल्लेख गर्दै सरकारले मुलुकको समृद्धिका लागि विदेशी लगानी भित्र्याउन उपयुक्त वातावरण बनाएको बताए ।

लामो समयको द्वन्द्वपछि मुलुक विकासको चरणमा प्रवेश गरेको उल्लेख गर्दै उनले नेपालमा लगानी गर्न विदेशी लगानीकर्तालाई आह्वानसमेत गरे । ‘मुलुकमा लगानीमैत्री वातावरण बनाउन सरकार हरसम्भव प्रयासरत छ’, उनले भने, ‘नेपाललाई लगानीको उत्कृष्ट गन्तव्य बनाउन लगानी सम्मेलन गरिएको हो ।’ उनले विदेशी लगानीका लागि सरकारले सबै प्रक्रिया सहज बनाइदिने प्रतिबद्धता जनाए । आर्थिक मुद्दामा सबै राजनीतिक दलको एकमत रहेको हुँदा लगानी सुरक्षाका विषयमा निश्चिन्त रहन उनको आग्रह छ ।